Sorgul Şêxo -Jînda Azad/JINHA

TIL TEMIR - Aliya Ela Aladîn (30) li bajarê Til Temir bi têkoşîna jiyanê re li hember kevneşopiyên civakî li berxwedide û bêy ku xwe bispêre cihekî 4 zarokên xwe xwedî dike. Aliya got, "Her jinek dikare bi hêza xwe li hembe zehmetiyên jiyanê li berxwe bide û bi têkoşîna xwe kevneşopiyê civakî bişkîne."

Jinên Rojava bi berxwedana xwe a li hember kevneşopiyê civakê û desthilatdariyê navê xwe li dîrokê neqişandin. Di nava şert û mercên giran de her jinek bi têkoşîna xwe çîrokek a jiyanê dinvîse. Aliya Ela Aldîn a 30'î salî dayîka 4 zarokane û hevjîna wê di hemleya Şehîd Rûbar de jiyana xwe ji dest dide. Aliya a ku berî salek hevjînê xwe wenda dike, tevî zarokên xwe têkoşîna jiyanê didin.

'Her jinek xwedî hêza rêvebirina jiyanê ye'

Aliya anî ziman ku ew hewldide hemû pêdiviyê jiyanê xwe bi xwe pêşwazî bike û wiha got, "Her jinek xwedî hêza rêvebirina jiyanê ye. Jin bêy ku xwe bispêre cihek ango kesek dikare bi vîn û hêza xwe jiyan li dora xwe biafîne. Çar zarokên min hene, yê herî mezin 9 saliye. Hevjînê min di 23'ê Sibata 2014'an de, di hemla Şehîd Rûbar de li bajarê Til Temir şehîd ket. Ji bo parastina axê xwe, xwe fedayî rêya têkoşînê kir. Piştî şahadeta wî tevahî xizmên me digotin tu bi tena xwe mayî, divê bêy ba me. Lê min vê yekê nepejrand. Ji ber her jinek dikare bi hêza xwe jiyanê rêvebibe. Ji xwe mêr hebin ango nebin jin malbatê mezin dike û xwedî dike."

'Berxwedana jin pêşengiya şoreşê kir'

Aliya bilêvkir ku ew hêza xwe ji jinên têkoşînvan û berxwedêr digre û wiha domand: "Bi şoreşa Rojava re baweriya min a li hember hêza jin zêdetir bû. Gelek jin di çaperên şer de li hember çeteyên dagirker DAIŞ'ê berxwedanek bê dawî nîşan da. Berxwedana jin pêşengiya şoreşê kir. Ev yek bandorek mezin li ser min kir. Ji vê berxwedanê min hêz girt û têkoşîna jiyana xwe didim. Niha hemû pêdiviyên jiyanê bi hewla xwe pêk tînim û zarokên xwe xwedî dikim."

'Divê tevahî jin bawerî bi xwe bînin'

Aliya di dawiyê de diyar kir ku ew bi sekna xwe li hember kevneşopiyê civakê têdikoşe û wiha got, "Divê her jin bawerî bi hêza xwe bîne û li hember zîhniyeta ku dibêje jin nikare tiştek bike têbikoşe. Jin li her qadê jiyanê dikare rengê xwe diyar bike û tevlî xebatê bibe. Her jinek dikare bi hêza xwe li hembe zehmetiyên jiyanê li berxwe bide û bi têkoşîna xwe kevneşopiyê civakî bişkîne. Ya girîng bawerî bi xwe anîne."

(rc)