Nurcan Yalçin - Têkoşîn Tekîn / JINHA

AMED - Hevseroka MEYA-DER'ê Ayşe Dîcle diyar kir ku ji mehê Tîrmehê û vir ve hêjmarê cenazeyên ku li sînor tê ragirtin gihêştiye 110'e û wiha got, "Herî dawî malbata Melîha Çûrûk a ku cenazeyê wê 43'ê rojan tê ragirtin serî li me da. Malbat ketin nava hemû hewldanan û kampanya dan despêkirin. Lê belê tu encam ne hat bi dest xistin. Kiryarê îşkencê yê ku li hember cenazeyan pêk tê, pêk anînên dervî ehlaqe."

Hikûmeta AKP'ê li aliyek şerê topyekûn li Kurdistanê daye despêkirin li aliyê din kiryarên dervî mirovahî li hember cenazeyan pêk tîne. Hêjmara cenazeyên ku ji meha Tîrmehê ve li sînor tên rawestandin her ku diçe zêdetir dibe. Herî dawî cenazeya şervana YPJ'ê Melîha Çûrûk a ku li herêma Holê yê girêdayî bajarê Hesekê a Rojava jiyana xwe ji dest daye ket rojevê me. Cenazeya Melîha a ku 43 rojin li sînor tê rawestandin, malbat ji bo ku cenazeyê keça xwe bigrin kampanya dan despêkirin. Hevseroka MEYA-DER'ê Ayşe Dîcle derbarê cenazeyê Melîha û ên din ku li sînor tê ragirtin de nirxandin kir û wiha got, "Çawan cenazeyê Azîz Gûler radestî malbatê hat kirin, divê cenazeyê Melîha Çûrûk û hemû cenazeyên tên ragirtin, radestî malbatê wan bên kirin."

'Zîhniyeta dewletê zîhniyeta DAIŞ'ê ye'

Ayşe li ser navê MEYA-DER'ê banga, divê dewlet dawî li polîtîkayên ku hember cenazeyan pêk tîne bîne û wiha domand: "Divê dewlet destên xwe ên qirêj ji ser gelê me û cenazeyên me vekşîne. Dewlet xendek dike hincet û bê sedem êrîş dibe ser gel û welatiyên me qetil dike. Em ne Kurdên salên 90'î ne, em êdî di ferqa hemû bûyerên ku pêk tên de ne. Komkujiyên ku pêk tên em napejrînin. Êrîşê dewletê gihêştiye astek wiha ku, hem me qetil dike û hem jî dest datîne ser cenazeyên me û şehîdgehên me topbaran dike. Ez êdî naxwazim bêjim AKP'ê ji ber bi zîhniyeta DAIŞ'ê tevdigere. Kirine armanc ku gelê kurd li ser erdîngeriya wan tune bikin. Lê divê baş were zanîn; gelê Kurd êdî ne yekin ne jî du ne, bi milyonan Kurd heye û dê tu car nekaribin tune bikin."

'Di nava 5 mehan de, bi sedan malbat ji bo cenazeyên xwe serî li me dan'

Ayşe destnîşan kir ku ji mehê Tirmehê ve hêjmara cenazeyên ku tên ragirtin gihêştiye 110'e û wiha pêde çû: "Herî dawî malbata Melîha Çûrûk a ku cenazeyê wê 43'ê rojan tê ragirtin serî li me da. Malbat ketin nava hemû hewldanan û kampanya dan despêkirin. Lê belê tu encam ne hat bi dest xistin. Çawan cenazeyê Azîz Gûler radestî malbatê hat kirin, divê cenazeyê Melîha Çûrûk û hemû cenazeyên tên ragirtin, radestî malbatê wan bên kirin. Di nava 5 mehan de, bi sedan malbat ji bo cenazeyên xwe serî li me dan. Em jî dibêjin bila destê xwe danin ser wîjdanên xwe û cenazeyên ku tên ragirtin bidin malbatên wan. Kiryarê îşkencê yê ku li hember cenazeyan pêk tê, pêk anînên dervî ehlaqe. Di ti olî de ev kiryar pêk ne hatine. Em ji vir carek din radighînin, em cenazeyên xwe bi rêya fermî dixwazin."

(rc)