Jînda Asmen/JINHA

ŞENGAL - Fermandara YJA Starê Mizgîn Jiyan der barê êrîşên DAIŞ'ê yên li ser Şengalê, revandina jinên Êzidî û berxwedana jinên Êzidî ya li hemberî çeteyên DAIŞ'ê de axivî û diyar kir ku li kuderê jinek Êzidî hatibe revandin ew rizgarkirina wî cihî ji bo xwe esas dibînin û wiha got: "Em ê perçeyekî axa Şengalê jî di destê DAIŞ'ê de nehêlin."

Yekitiya Jinên Azad a Starê (YJA Star) ku di rizgarkirina Şengalê ji çeteyê DAIŞ'ê de pêşengiyê dike, di refên herî pêşde têkoşîna xwe didomînin û di hamleya rizgarkirina Şengalê de cihê xwe digirin. Fermandara YJA Starê Mizgîn Jiyan, der barê êrîşên çeteyê DAIŞ'ê ku di 3 yê Tebaxa 2014'an de destpê kiribû ji ajansa me re axivî.

Mizgîn diyar kir ku di êrîşên 3 yê Tebaxa 2014'an de çeteyên DAIŞ'ê hedef dikir ku gelê Êzidî tune bike, xwest qetlîamek mezin pêk bînin û wiha got: "Pêşmergan gelê Êzidî bi tenê hiştin û reviyan. DAIŞ'ê Şengal dorpêç kir û xwest dagir bike. Li hemberî vê gelê Êzidî xwe spartin Çiyayê Şengalê."

'Me şehîd dan, birîndarên me çêbûn lê me tucarî pes nekir'

Mizgîn da zanîn ku bi êrîşê re gelê Êzidî bi rojan tî û birçî man û wiha domand: "Gelê ji ber DAIŞ'ê reviya nekarîn tiştekî bibin tenê karîn xwe rizgar bikin. Bi alîkariya YJA-Star, HPG, YPG û YPJ'ê korîdora însanî ya di navbera Rojava û Şengalê hat vekirin. Grubên me yên ku pêşî hatin şerê li hemberî DAIŞ'ê bi awayekî xurt destpê kir. Piştî Korîdor hat vekirin em grubek ji Qendîlê yekser derbasî Şengalê bûn. Bi alîkariya YPG/YPJ'ê me beşek mezin ê gelê Şengalê ku xwe spartibûn Çiyayê Şengalê di korîdorê re derbasî Rojava kir û niha li Kampa Newrozê dimînin. DAIŞ'ê bê navber êrîşên xwe domand. Çeteyan çiya dorpêç kirin û bê navber pêşde dihatin. Gihiştibûn gundê Kerse yê. Me bi berxwedanê pêşdehatina wan rawesitand. Di şerê bi rojan berdewam kir de çeteyan gelek windahî dan û mecûr man ku hêzên xwe paşde bikişînin. Di vekirina korîdor û parastina wê de hinek hevalên me şehîd ketin, birîndarên me çêbûn lê me pes nekir."

'Em ê parastina Şengalê bidomînin'

Mizgîn anî ziman ku pêşmergeyên girêdayî PDK'ê gelê Êzidî bi mirinê re rûbirû hiştin, li kuderê guleyek bi teqe pêşerge bêy ku çekê bi karbîn ji wir direvin û wiha axivî: "Îxanet li gelê Êzidî kirin. Ev rastiyeke ku nayê veşartine. Tu bandora PDK'ê ya li ser gel nemabû, gelê Êzidî li hemberî rastiya ku şahidiya wê kirin baweriya xwe bi me anîn. Ji ber ku hemû hewldanên me ji bo ka em ê çawa gel rizgar bikin û bibin cihên ewle bû. Bi vekirina korîdorê me parastina çiyayê Şengalê kir. Gerîlayên YJA Star û HPG'ê hemû ewlehiya gel girtin û em ê parastina Şengalê bidomînin."

'Beriya fermanê em ê ketibana Şengalê lê PDK'ê destûr neda'

Mizgîn nirxandinên Rêberê PKK'ê Abdullah Ocalan ên der barê gelê Êzidî de bi bîr xist û wiha pêde çû: "Rêberê me qetlîama li ser gelê Êzidî ferq kiribû û em hişyar kirin. Bi awayekî vekirî diyar kiribû ku divê berî fermanê em bikevin Şengalê û gelê Êzidî li hemberî qetlîaman bi parêzin. Em wekî YJA Star û HPG'ê me xwest bikevin Şengalê lê PDK li pêşiya me bû asteng. Heta hat gotin ku 'Li hemberî êrîşên li ser Şengalê em ê wan bi parêzin û hêza me heye' lê çi bû neparastin û li Şengalê şer ne kirin. Heta di jiyîna fermanê de alîkarî kirin. Gelê Êzidî bi qetlîmê re rûbirû hiştin. Bi vekirî Şengal ji çav derxistin. Ger YJA Star û HPG negihiştibanê dê qetlîamên xiraptir bihatina jiyîn. Şengal ji bo gelê Êzidî xwedî dirokek girînge, di heman demê de Şengal di Rojhelata Navîn de malovanî ji mirovahiyê re kiriye ji ber vê yekê DAIŞ'ê xwest vê dîrokê ji holê rakin, çi ji detê wan hat kir lê encam ne girtin."

'Armanca me ya sereke parastina gel û azad kirina Şengalê bû'

Mizgîn destnîşan kir ku di pêvajoya rizgar kirina Şengalê de şerên dijwar qewimîn û wiha got: "YJA Star, HPG, YBŞ û YPJ Şengal em nêzî çeperên DAIŞ'ê bûn. Me derdora Çiyayê Şengalê girt. Di serî de armanca me ya sereke parastina gel û rizgar kirina Şengalê bû. Hêzên DAIŞ'ê zû pes ne kirin. Em jî dest ji armanca xwe bernadin. Di pêvajoya destpêkê ya çalakî û şerê me de me taxên ku digirtin Şengala berê rizgar kirin. Bi vê re çeperên me yên li derdora çiya xwe berdan Şengalê. Me salekê di van çepran de li ber xwe da. Di navbera me û DAIŞ'ê de 20-50 kîlometre hebû."

'Gelê Êzidî dema jinên şerker dîtin matayî man'

Mizgîn da xuyakirin ku di berxwedana Şengalê de hebûna jinan bandorek mezin li ser gel kir û axaftina xwe wiha domand: "Dema gelê Êzidî destpêkê jinên YJA Starê dîtin hem matmayî man hem jî pê bandor bûn. Gelek ji wan em nasne dikirin. Yên ku em nasdikirin digotin 'PKK hat' yan jî tenê navê PKK'ê dizanîn. Berxwedan û keda jinan ku li hemberî jiyînên ji 3 yê Tebaxê heta niha pêk hatin bandorek mezin li ser jinên Êzidî kir. Ji xwe baweriya ji me girtin hêza xwe ya leşkerî YPJ Şengal bi alîkariya me ava kirin. Jinên Êzidî rexmî hemû bê îmkaniyan zû fêrbûn û xwe bi rêxistin kirin. Êdî jinên Êzidî bawer kirin ku dikarin xwe bi parêzin, çek bi kar bînin û ev yek xistin meriyetê."

'Jinên Êzidî êdî xwedî vînin û bi hêzin'

Mizgîn anî ziman ku jinên Êzidî niha xwedî vînin, bi hêzin û wiha got: "Jinên Êzidî êdî dikarin li hemberî êrîşan xwe biparêzin. Gelek jinan xwestin fêrî bi karanîna çekê bibin û fêr bûn. Jinan fêmkirin ku mehkûmî mirinê nînin. Li gelek çeperan bi awayekî aktîf rol girtin û şer kirin. Her çiqasî kêmasî hebin jî hêzek a jinê hat avakirin û didome."

'YPJ Şengal jî wekî YJA Starê di hemleyê de rolekî girîng lihîst'

Mizgîn bi lêv kir ku di 13'ê Cotmehê de Şengal hat rizgarkirin û ev tişt anîn ziman: "Çeteyên DAIŞ'ê piştî pêvajoyek dijwar çeperên xwe winda kirin û gelek windahî dan. Di 13'ê Cothemê de ji tevahiya Şengalê hatin derxistin. Di hemleya rizgar kirina Şengalê de wekî her car YJA Starê di refên pêş de rolek mezin lihîst. YPJ Şengal jî wekî YJA Starê di hemleyê de rolekî girîng lihîs û têkoşîn da."

'Me soz daye ku em ê heyfa jinên Êzidî bigirin'

Mizgîn di berdewamiya axaftina xwe de wiha got: "Ketina jinên Êzidî ya destê DAIŞ'ê û pêkanînên hovane yên li ser jinan di nava YJA Star û YPJ Şengalê de hêrsek mezin ava kir. Li kudera Şengalê jinên Êzidî hatibin revandin me azadkirina wê derê bingeh girt. Me wekî YJA Starê soz daye ku em ê heyfa hemû jinên hatine revandin bigirin. Me hemû hêza xwe ji bo azadiya jinan û gelê Êzidî danî holê û em ê bidomînin. Em baş dizanin ku hîna talûke didome divê hêj bêhtir em têbikoşîn em di ferqa vê dene. Hîna hemû jinên Êzidî ji destê çeteyan ne hatine rizgarkirin. Ji ber vê yekê çiqad azad kirina Şengalê me keyfxwe kiribe jî lê aliyekî em hêj êş dikişîne. Ji ber ku em ê jinên hatine revandin tu carî ji bîr nekin. Ji bo azad kirina wan jinan çi ji destê me hat me kir û em ê bikin jî."

'Dema ku em hinektin zu hatibana me dikarî em jinan rizgar biki'

Mizgîn anî ziman ku gel û tayîbetî jî jinên Êzidî tişta jiyan kirine bi gotinan nikare bê ziman û wiha domand: "Ez çî bêjim têr nake, wan rojan bi xwe jiyan kirin tiştek gelek cudaye. Her çiqasî hewilbidim bînim ziman jî kêm dimîne. Hestên wê demê, deng, dîmen gelek cudane û heyînên gelek watedarin. Ez dixwazim dubare vê bêjim. Ger hinekdin me karîbana em zu bên me dikarî girtina jinan a destê DAIŞ'ê asteng bikin. Ev ji bo me jî êşek gelek mezine. Dema ku hevalên me ji bo mudaxeleya Şengalê hatin ji aliyê hêzên PDK'ê ve hatin girtin. Ji ber ku PDK'ê pêşiya me girt nehêla em pêşî li êrîşan bigirin ev qirkirin hat jiyan kirin. Tenê em hinekdin zutir hatibana dê her tişt hîn zêdetir cudabana."

'Emê tenê bostek axa Şengalê di destê DAIŞ'ê de nehêlin'

Mizgîn bilêv kir ku hîna operasona rizgariya gundên Şengalê berdewam dike û wiha dom kir: "Şengal bi xwe hatiye rizgarkirin lê hîna gundên derdorê di destê çeteyên DAIŞ'ê dene. Ji bo azadiya van gundan jî hinek amadekariyên me hene. Ez bi rehetî dikarim bêjim ku emê bostek axa Şengalê di destê DAIŞ'ê de nehêlin. Bi azadiya Şengalê re çeperên me hîn zêdetir fereh bûn. Li gorî wê me karê xwe jî girtiye bin ewlehiyê. Emê ji niha û şonde jî peyîwira xwe berdewam bikin. Emê Şengalê bikin cihê ku gelê Êzidî bi rengê xwe li ser xwe bide jiyankirin. Heya serketina vê emê peyîwira xwe berdewam bikin. Ji ber ku li Rojhilata Navîn her dem gel bi rengê xwe xwe dane jiyan kirin û dê bi wî awayî jiyana xwe bidin berdewam kirin. Weke Rêbertiya me gotî: 'Her gelek di hemêza xwe de dewlemendiyek çandê digire.' Li ser vî bingehî dê Şengal kevnareya xwe carekdin bigire dest û zêdetir bihêz bide jiyan kirin. Ji bo wê jî divê em Şengalê ji nû ve ava bikin. Her kes çî ji destê wan tê bila ji bo ji nû ve avakirina Şengalê rol bigire."

(zt)