JINHA

AMED - Bi pêşengiya KJA yê dê bi diruşma"Qatîlê jinan dewlete" di 25'ê kanûnê de jin dakevin qadan. Girêdayî mijarê Endama Kordinasyona Navenda Jinan Kardelenê Mukaddes Alataş, got: "Divê jin demek ji ya din zutir dakevin qadan. Tenê jin dikarin pêşiya vî şerî bigirin. Divê ti jin xwe bêçare hîs nekin û bi vê meşê dengê xwe bidin bihîstin."

Bi pêşengiya Kongreya Jinên Azad (KJA) ê bi diruşma"Qatîlê jinan dewlete" di 25'ê kanûnê de jin dakevin qadan. Li Amedê di saet 12.00'an de jin dê li be Navenda DBP'a Amedê bên bahev heya ber Bîrdariya Mafê Jiyanê ya Parka Koşuyoluyê bimeşin. Her wiha dê ji bo Sakine Cansiz, Fidan Dogan û Leyla Şaylemez ên di 9'ê Çile ya sala 2013'an li Parîsê hatine qetilkirin ji 1 heya 9'ê Çile çalakî bên lidarxistin. Bi pêşengiya KJA yê dê jin li Amedê di roja 9'ê Çileyê de li Meydana Batikentê çalakî bêlidarxistin. Girêdayî çalakiyan Endama Kordinasyona Navenda Jinan Kardelenê Mukaddes Alataş wiha got: "Emê di roja 25'ê kanûnê de weke KJA li Kurdistanê çalakiyên girseyî lidarbixin. Bi îlana rêveberiyên cewherî re di serî de li Silopî, Şirnex, Cizîr, Sur, Nisêbîn, Kerboran û gelek deverên dinê dewlet êrîşî jin û zarokan dike, jin û zaroka qetildike û hewildide vê weke tiştek ji rêzê û normale bi mirovan bide hînkirin.

'Em bang li hemû jinan dikin ku dakevin qadan'

Mukaddes wiha berdewam kir: "Divê demek ji ya din zutir jin têkevin nava tevgerê. Tenê jin dikarin pêşiya vî şerî bigirin. Divê ti jin xwe bêçare hîs nekin. Bila hemû jin bi vê meşê dengê xwe bidin bihîstin. Ji bo ku em ji qirkirinan re bêjin bese û êdî qirkirinên jinan neyê jiyankirin di 9'ê Çile de jî em bang li hemû jinan dikin dakevin qadan. Di navbera 1 - 9'ê Çile de jî ji bo balkişandina ser qirkirinên jinan emê çalakiyên cihê reng lidarbixin. Emê li Amedê du meşên mezin lidarbixin. Yek ji van meşan di 25'ê kanûnê de ya dinê jî di 9'ê Çile de. Di 9'ê Çile de ji bo protestokirina qetilkirina Sakine Cansiz emê li Meydana Batikentê di çalakiyê debin."

(zt)