JINHA

ÊLIH - Jinên Êlihê komkujiya jinan ên ku di bin navê qedexeyan de tên kirin şermezar kirin û wiha gotin, "Hikûmeta AKP'ê yê ku ji tilîlî û berxwedana jinan ditirse, çare di êrîşa ser bedena jin de dibîne."

Bi pêşengiya Midûra Polîtîkayên Jin a Şaredariya Êlihê derbarê qetilkirina jinan ên di bin navê qedexeyê derketinê de tên pêk anîn daxuyanî dan çapemeniyê. Di daxuyaniya ku li Navenda Şêwirmendiya Jin a Selîsê de hat dayîn, Parlementera HDP'ê yê Êlihê Ayşe Acar Başaran, Hevşaradara Êlihê Gûlîstan Akel, saziyên jin û gelek jin beşdar bû. Jinan pankarta "Em şahîdê komkujiya jin û zarokanin! Em qatîlan nasdikin" û dovîzên "Jin avakarê civak û aştiyê ye" û "Şer herî zêde jinan dikûje" hatin hildan. Nurcan Tekîn ser navê Selîsê daxuyanî da û wiha got, "Divê dewleta AKP'ê vê yekê baş zanibe, jin li hember dagirkerî, cînayet û polîtîkayên tecevûzkariyê dê bi rihê azad û sekna serhildêriyê li berxwebide"

'Wek jin di nava her şertî de em ê li berxwe bidin'

Nurcan jinên ku li Cizîr, Nisêbîn, Silopî û herî dawiyê Şirîn Oter û Yelîz Erbay a ku li Stenbolê hatine qetilkirin bi bîrxist û wiha got, "Li hember daxwaza xwerêveberinê yê gelê Kurdistanê, dewlet bi deh hezaran leşker, polîs, MÎT û hêzên çete ên taybet êrîş dike; bi tang û topan êrîşê gel, erdîngerî û nirxên me ên dîrokî dike û dixwaze qirkirinê pêk bîne. Dewleta AKP'ê ji bo ku berxwedarên li Kurdistanê ji holê rake serî li her rêyê dide. Wek jin em ê li hember polîtîkayên dewletê ên tecevûzkar û qirkirinê di nava her şertî de berxwedan esas bigrin."

'Em kujerê jin û zarokan baş nasdikin'

Nurcan di dawiya gotina xwede wiha got, "Divê dewleta AKP'ê vê yekê baş zanibe, jin li hember dagirkerî, cînayet û polîtîkayên tecevûzkariyê dê bi rihê azad û sekna serhildêriyê li berxwebide. Em kujerê jin û zarokan baş nasdikin. Ji ber vê em carek din dengê xwe bilind dikin û dibêjin em ê li berxwe bidin."

(rc)