JINHA

AMED - Hevserokên ku diyar kirin heya rakirin dorpêçê dê ji Surê dernekevin dest bi çalakiya runiştinê kirin. Hevseroka KCD'ê Selma Irmak got: "Heya em bertekên xwe nîşan nedin dê ev dorpêç nerabe. Tenê berxwedana gel dikare vê dorpêçê rake. Ez bang li gelê Amedê dikim roj roja rabûna ser lingane. Roj roja di berxwedanê de yekbûnê ye."

Hemû hilbijêrên Amedê li Navenda Çand û Hunera Dicle Firadê ya ser Cadeya Melik Ahmet dest bi çalakiya runiştinê kirin. Hilbijêran dan zanîn ku dê heya rabûna dorpêça ser Surê li wê di çalakiyê debin.

'Mirovên hatine qetilkirin û birîndar hene em agahî ji hindir nagirin'

Hevşaredarê Bajarê Mezinê Amedê Firat Anli got: "Li Surê 24 rojin qedexeya derketina kolanan berdewam dike. Hiş, mejî û dilê Amedê ser Surê ye. Bi hezaran welatiyên me dibin bombadumanê denin. Heya rakirina qedexeyê emê çalakiya xwe berdewam bikin. Li ser vê erdnîgariyê 40 salin em êşê dikêşin. Lê ti deman weke niha hemû civak negirtine bin esaret û êrîşan. Yên jiyana xwe jidest dane hene, birîndar hene. Em ji hindirê navçeyê xeber nagirin. Dixwazin gelekê ceza bikin."

'Em amadene li bi gelê xwe re bedel bidin'

Firat anî ziman ku di demboriyê de jî Amedê vîna xwe nîşandaye û wiha domand: "Ger hîna yên dengê me bibihîsin hebin. Dawî li vê bêmafî û bê hiquqiyê bînin. Êdî gelê me zêdetir sebrê nîşanî van qirkirinan nade. Gelo karê tang û topan di nava bajê de çiye? Li aliyekê mirovan qetildikin, li aliyê dinê bajêr digirin bin dorpêçê. Berî mehekê Serokê Baroyê Tahir Elçi li ber Minareya Çar Ling qetilkirin. Lê hîna faîl dernexistine holê. Çî dibe bila bibe emê bi gelê xwe re bin. Çî bedel bê xwestin em bi gelê xwe re amadene bidin. Ji bo zêdetir pêşî li êş û qeyîban venebe bila zu vê dorpêçê rakin."

Firat bilvkir ku gelê Amedê bi berxwedana Surê radikeve radibe û wiha berdewam kir: "Emê li bi gelê xwe re bin. Heya dawî li van kirinan neyê emê çalakiyên xwe berdewam bikin. Îro roja bi hev re deng derxistinêye. Em ji her kesên di nava berxwedanê denin silav dişînin."

'Dê dorpêç bi berxwedana gel bê rakirin'

Hevseroka KCD'ê Selma Irmak jî daxuyaniyek da. Selam diyar kir ku 24 rojin Sur dibin dorpêçek girandene, êrîşên îşkalê ser Surê berdewam dike. Selma bilêv kir ku dê weke hilbijêrên bajêr bi gelê xwe re nin. Selma bang li gelê Amedê kir û got: "Heya em bertekên xwe nîşan nedin dê ev dorpêç nerabe. Tenê berxwedana gel dikare vê dorpêçê rake. Ez bang li gelê Amedê dikim roj roja rabûna ser lingane. Roj roja di berxwedanê de yekbûnê ye. Tenê berxwedana gelê me dikare çaresriyê bîne. Ev berxwedan ji bo mirovahiyê û vîna mirovahiyê ye. Divê hemû kurdên li her deverê dijî li vê berxwedanê xwedî derkevin."

Selma destnîşan kir ku pirsgirêka kurd ne bi tang û topan bi muzakereyan dikare bê çareserkirin û wiha dom kir: "Bi Birêz Abdullah Ocalan re dikare çareseriyê pêşbixin, telebên siyasî dikarin têxin rojevê. Silav ji bo Nisêbîn, Kerboran, Cizîr, Silopî û Surê. Emê li vêderê bin heya rakirina dorpêçê."

Piştî daxuyaniyê hilbijêran û girseya gel li ser Cadeya Melik Ahmet dest bi çalakiya runiştinê kirin.

(zt)