JINHA

MÊRDÎN - Gelê Nisêbînê yê ku bi berxwedana xwe dorpêça 7. şikandin wiha gotin, "Ligel her tiştê berxwedana me dê bidome." Jinên ku malê wan ji ber êrîşên bi tangan hatî rûxandin wiha gotin, "Dibêjin YDG-H kiriye? Ma qey tangê ciwanan heye? Bila malên me fedayê ciwanan be."

Li navçeya Nisêbîna Mêrdînê qedexeya derketina kolanan a di roja 11'an de di encama berxwedana gel de bi dawî bû. Bi rojan e êrîşên giran li ser taxên Kişla, Zeynel Abîdîn, Firat, Dîcle, Yenîşehîr, Abdulkadîrpaşa û tevahiya Nisêbînê pêk hatin. Di vê qedexeyê de di hedefa êrîşan de tevahî navçeyê Nisêbînê bû. Piştî rakirina qedexeyê dîmenên hovane yên êrîşan derketin holê. Li taxên ku xaniyên welatî lê hatî hedef girtin mal, kargeh û dîwarên hewşa Mizgeftê û dikan hatine hilweşandin. Gel derket kolanan û dest bi tamîrkirina dîwarên hatine rûxandin kirin.

'Li hember perestgehên me jî tehmûla wan nîne'

Welatiyan li hember êrîşên ser Mizgefta Melle Musa yê taxa Zeynelabîdîn bertek nîşan dan û wiha gotin, "Ên ku van êrîşan pêk tînin ne îman ne jî olê wan heye. Berî çend sal ev mizgeft ji aliyê gel ve hat înşa kirin. Tehmûla wan li hember perestgehên me jî nemaye." Di êrîşan de malê apê Parlementera HDP'ê ya Mêrdîn Gulser Yildirim, Alî Yildirim bû hedefê êrîşan. Alî da zanîn ku dîwarê baxçê hatî rûxandin û bi sedan şopê guleyan li ser deriyê malê ye û wiha got, "Ez van êrîşan ji salê 1990'an ve nasdikim. Malê min bi zanabûn hedef nîşan dan. Salên borî gundê me şewitandin û bi salan di girtîgehan de mam. Bila malê min fedayê têkoşîna vî gelîbe." Alî her wiha diyar kir ku gelek eşyayên mal hatine wenda kirin û wiha domand: "Nexweşiya dil bi min re hey, ez wê navberê ne li malbûm. Piştî vegeriyam malê min dît gelek tişt nîne."

'Welî got 'rûxandin ji bo ewlehiya gelê me ye'

Perîhan Çetîn jî destnîşan kir ku di 22'ê Kanûnê de wesayîtên zirxî ên ku ketine taxê dîwarê hewşa malê wê hilweşandiye û wiha got, "Ez tevî zarokên xwe derbasî odeyê piştê bûm. Ez li Walî gerîm, ji min re got, 'em wê nakin, YDG-H dike'. Dema ku min bertek nîşan da û got 'ma tangê YDG-H'ê heye, niha tang mala min hildiweşîne', bersiva 'Polîs vê yekê ji bo ewlehiya canê we dikin. Ziyanê ku pêk were em ê duvre çêkin'. Min piştî wan gotinan telefonê ser rûyê wan de girt. Em ne mûhtacê pere û nanê wanin. Bila tenê me rihet bihêlin û biçin bese."

'Heya ku li ser vê axê mirov hebin, ev ax pîroze'

Medya Tanhan jî wiha got, "Piştî êrîşan em derketin û me dît her tişt hatiye guherîn. Her der di bin êrîşê de maye. Bila fedayê ciwanên me be, bila ne mirin be yê din ne xeme. Divê dayîkê leşker û polîsan jî wek me bikin, bila dev ji gotina 'welat saxbe' berdin. Piştî mirinê zarokan welat saxbe ji çire ye. Heya ku li ser vê axê mirov hebin, ev ax pîroze. Mejiyê xwe bigirin serê xwe û ji bo aştiyê têbikoşin."

(rc)