JINHA

ŞIRNEX - Cara sêyem li gundê Erbakê êrîşî meşa welatiyên ku ji Hezexê serê sibê ji bo şikandina dorpêça ser Cizîrê ketine rê kirin. Li Kerboranê jî mudaxeleyî meşê kirin, piştî meşê çalakiya runiştinê hat despêkirin.

Li hember dorpêçên li Kurdistanê berdewam dike welatiyên Hezexê serê sibê ber bi Cizîrê ve meşiyan. Li Deştadarê û gundê Kovakê meşa welatiyan rastî êrîşa wesayîtên zirxî hat. Li gel mudaxeleyê jî meşa welatiyan berdewam kir. Cara sêyem li gundê Erbakê jî meşa gel rastî mudaxeleyê hat. Welatiyan li hemberî êrîşên wesayîtên zirxiyên bi bombeyên gazê û guleyên rastî diruşmên "Bijî berxwedana Cizîrê" bilind kirin. Di dema êrîşan de helîkopter jî ser gund digeriyan.

Li Kerboranê jî dema êrîşî meşê kirin çalakiya runiştinê hat despêkirin

Li navçeya Kerborana Mêrdînê di roja 14'an de li hember êrîşan berxwedan berdewam dike. Ji bo alîkariyê rêxistina DBP'a navçeyê bang li navçeyên derdorê kir. Li ser banga rêxistina DBP'a navçeyê parlementerên HDP'ê Gulser Yildirim, Mithat Sancar, Mehmet Ali Aslanî, Tugba Ezer, rêveberên navend û navçeyên DBP û HDP'ê yên Mêrdînê jî di navê de komek welatiyan ber bi Kerboranê ve ketin rê. Bi qasî 10 kîlometre mayî ji ketina navçeyê re li gundê Serdêlê welatî hatin asteng kirin û li pêşiya wan barîkatên leşkerî hatin danîn û desturê nadin derbasbûna wan. Piştî mudaxeleyê çalakiya runiştinê hat despêkirin.

(zt)