Tugba Akyilmaz/JINHA

ŞENGAL - Jinên Êzidî ên ji ber dagirkerî û komkujiya çeteyên DAIŞ'ê berê xwe dan çiyayê Şengalê berxwedana Bakûrê Kurdsitanê silav kirin û wiha gotin, "Li hember her cureyê êrîşê gelê me li berxwedidin û ji dijmin re serî natewînin. Çawan ku DAIŞ li hember hêzê ciwanên vî gelî têk çû, artêşa Tirk jî dema ku navê ciwanên Kurd bibihîse wê rêya revê bigere."

Jinên ku ji kurehiya dilê xwe êşê fermanê jiyane, êşa tevahî jinan jî di dilê xwede hîsdikin. Jinên xwedî axa Şengalê ên ku bi hezaran zarên xwe wenda kirine û di qirkirinê re derbas bûne, bertekên xwe li hember zilm û hovîtiya dewleta Tirk nîşan didin. Jina Şengalê Leylê Husen diyar kir ku, dewleta Tirk wek çeteyên DAIŞ'ê tevdigere û ferqa wan ji hev nemaye û wiha got, "Saleke êşek nema û me jiyan nekir. Şengal rizgarbû, em bendê rizgarkirinê dîlgirtinên di destê çeteyan de bûn. Lê vê carê dewleta Tirk bi kiryarên xwe ên hovane li hember gelê me ên bakûr zilmê dike. Ma qey ev gel neçare bigrî?"

'Dê dawiya Erdogan jî wek dîktatorên din be'

Leylê gelê Kurdistanê ên ku ligel her cûryê êrîşan li berxwedide û serî natewînin silav kir û wiha domand: "Li hember her cureyê êrîşê gelê me li berxwedidin û ji dijmin re serî natewînin. Çawan ku DAIŞ li hember hêzê ciwanên vî gelî têk çû, artêşa Tirk jî dema ku navê ciwanên Kurd bibihîse wê rêya revê bigere. Xwedê êşê ewladê bi Erdogan jî bide jiyandin. Bila bibîne da ku êşê dayîkan bizanibe. Erdogan bi xwe çeteyê herî mezine. Ew emîrê çeteyane. Dê dawiya Erdogan jî wek dîktatorên din be."

'Êş wê vîna vî gelî neşkîne, ma qey fêm nekirin?'

Zeytun Ezêr da zanîn ku ew ligel hemû şert û mercên giran û êrîşê çeteyên DAIŞ'ê dev ji axên xwe bernedane û berxwedidin. Zeytun wiha got, "Gelê me ên li bakûrê Kurdistanê taxên xwe terk nakin. Divê tevahî dijminên me vê yekê zanibe, heya dilopê xwîna xwe yê dawî em ê dev ji axên xwe bernedin. Ji me çi dixwazin. Evder Kurdistane û em jî gelê Kurdin. Dema fermana Şengalê gelê bakûr deriyê malên xwe ji mera vekirin û alîkarî dan me. Niha jî ew di nava şerên girande dijîn divê her kes deng û piştgirî bide wan. Bila xwedê û Melekê Tavus li ba wan be. Dijminê me divê baş bizanibe, bi xirabiyê xirabî pêk tê. Tiştê bi serê vî gelî anîne wê bi serê wan de bê. Xwedê vê yekê li ba wan nehêle. Êş wê vîna vî gelî neşkîne, ma qey fêm nekirin? Ew çiqas bi ser me de bên em ê ewqas li berxwe bidin. Gelê bakûrê Kurdisatan dixwaze bi xwe rêvebibe û bi vîna xwe jiyana xwe rêvebibe. Divê rêz nîşanî vê yekê bidin."

'Ew çiqas êrîş bikin berxwedan dê ewqas mezin be'

Zeytun destnîşan kir ku leşkerên Tirk jî wek DAIŞ'ê kiryarên hovîtî pêk tînin û wiha pêde çû: "Niha ferqê wan ji DAIŞ'ê nemaye. Zarokên ne hatî dinê yên di zikê dayîkên xwe de tên qetil kirin. Ev di kîjan bawerî û olî de heye. Ji xwedê natirsin qey? Mala bombe dikin, hildiweşînin pîran qetil dikin. Ha DAIŞ ha Erdogan çi ferqê wan heye? Ew hemû yekin. Ew çiqas êrîş bikin berxwedan dê ewqas mezin be."

(rc)