Filiz Zeyrek/JINHA

EDENE - Jinên Edenê pêkanîn û êrîşên di bin navê qedexeya derketinê a li bakûrê Kurdistanê nirxandin û hêrsê xwe li hember dewletê nîşan dan. Jinan destnîşan kir ku dewleta Tirk bi rêbazên DAIŞ'ê êrîşê gelê Kurd dike û gotin ew êrîş dê bê encambin û berxwedana gelê Kurd silav kirin.

Jinên Edenê bertek nîşanî êrîşên hember gelê sivîl ên ku li bakûrê Kurdistanê pêk tê dan. Seyran Kutluk (24) a ku li Taxa Gûlbahçe ya navçeya Seyhana Edenê dijî, di despêka axaftinê xwede bi taybet jin û tevahî gelê ku li Kurdistanê berxwedide silav kir. Seyran da zanîn ku şer ziyanê herî mezin dide jin û wiha domand: "Di nava şer de herî zêde jin êşê dikêşin û dilê wan dişewite. Jinên dûcanî jî tên hedef girtin, tehmûla wan li hember zarokê di zikê dayîkê de jî nemaye. Ez van bûyeran lanet dikim."

'Çawan destê wan girt, zarokê 8 mehî qetilkirin'

Seyran bilêvkir ku êrîşên dewletê ên ser gelê sivîl wê bi hêrs dike û wiha berdewam kir, "Çawan destê wan girt, zarokê 8 mehî qetilkirin. Li hember dîmenên wiha dilê me êdî nagre. Lê dewlet zarokê ne hatî dinê qetil dike. Ji ber vî şerî bi sedan sivîl hatin qetilkirin û piraniya wan jin û zarokin. Çima ewqas nefret, Kurd çi ji wan kiriye. Lê divê baş were zanîn gelê Kurd ne bi tenê ye. Gelê Kurd ji bo aştiyê pir xebitî û aştî ji devê wan neket. Ligel van hemû êşan em cardin dibên aştî, ji ber hêviyê me ji aştiyê zêdetire."

'Niha dema yekbûnê'

Şemsa Yaşar (60) a ku li taxa Dagiliogu ya Seyhanê dijî destnîşan kir ku berxwedana Kurdistaniyan rizgariyê gelan nîşan dide û wiha got, "Zilmê dewletê li ser me hemûyan dê mezintir bibe. Li Kurdistanê zilm û komkujî heye. Jin û zarokan qetil dikin. Zarokên me ên ne hatine dinê tên qetilkirin, malên me hildiweşînin, sewalên me dikûjin. Ez ji vir bang li tevahî Kurdan dikim, hîna bendê çine? Niha dema yekbûnê ye. Werin em dest bidin destê hev û li hember van pêkanînên hovane bisekinin. Ez ji cerdevanan re dibêjim, hûnê heya kengê li dijî gelê xwe şerbikin, werin û dest bidin destê me û em tev bi hevre li hember komkujiyan serî rakin û aştî bînin welat."

'Kiryarên DAIŞ'ê çibe yê dewleta Tirk jî ew e'

Zûbeyde Yagiz (42) êrîşên ku pêk tê şermezar kir û diyar kir ku gelê kurd tu car şer nexwestiye û wiha pêde çû: "Yê ku welat anî vî rewşî dewlete û rayadarên wê ye. Serokomar û Serokwezîr ji bo berjiwendiya xwe welat ber bi şer ve bir. Bajarên Kurdistanê wek Kobanê lê kirin. DAIŞ'ê li Rojava çi kiribe, dewleta Tirk jî li bakûrê Kurdistanê heman tişt kir. Dibêjin ku mislimanin lê perestgeh û mizgeftan hildiweşînin û dişewitînin. Zarok, jin û pîran qetilkirin, îşkence pêk anîn, Kuranê Kerîm şewitandin, mizgeft û goristanan topbaran kirin di kîjan olîde heye. Berxwedana gelê Kurd wê tu caran neşke û heya dawî dê li berxwe bide."

(rc)