JINHA

NAVENDA NÛÇEYAN - Koordînasyona KJK'ê got, "Em bang li her kesî dikin ku xwedî li wijdan û exlaqê mirovahiyê derkevin û têkoşîna li dijî tecrîda li ser Rêberê me, mezin bikin. Azadiya Rêberê me, şînbûna aştî û demokrasiyê ye. Aştî û demokrasî wê bi Rêberê me re şîn bibe. Pêwîste gelên me li dora vê hêviyê bicivin, bi hêz û morala mezin a ji Rêberê me werdigire re, vê têkoşîna wijdanî û bi rûmet mezin bike."

Koordînasyona KJK'ê da xuyakirin ku dijminatiya nîjadperestî ya faşîzma AKP'ê ji destpêkê ve li hemberî Kurdan dike, di nava du salên dawî de bi awayekî zelal derketiye holê û got, "Di pêvajoya şerê taybet de ku di bin navê 'diyalog' û 'pêvajoya çareseriyê' ya bi Rêberê Gelê Kurd re dimeşand, dewleta Tirk bingeha şerekî xurt ê tinekirinê yê li hemberî gelê Kurd, tifaqê vê yên bi xwîn û zemîna wê ya polîtîk afirand. Gava destpêkê ya vî şerê tinekirinê, bi tecrîda li ser Rêberê me û polîtîkayên şerê taybet re hat avêtin. Di civîna MGK a Cotmeha 2014'an de, dewleta Tirk û desthliatdariya AKP'ê, bi hin têkiliyên xwe yên gemarî û tarî re, di oxira hegemonya xwe de biryara şerê herî mezin ê dîroka xwe da. Biryara şerê gemarî û herî mezin ê dîroka Komarê, bi şidandina tecrîda li ser Rêberê me ku bûye hêviya demokrasî û aştiya bi rûmet a gelên Tirkiyeyê, hatiye wergirtin. Lewma, ji destpêkê ve ti carî maseyeke çareseriyê nehatiye danîn. Bi sextekarî û durûtiyeke mezin re hewl daye Rêberê me bi kar bîne û ji destpêkê ve xwestiye teslîmiyetê ferz bike. Qirkirina ku ji Kurdan re rewa tê dîtin, her tim hatiye parastin. Di pêvajoya du salan de hewldanên Rêberê me ku siyaseta demokratîk weke rêbaza bingehîn a çareseriyê ferz dikir, pêngavên di vî warî de avêt û vîna çareserî û rewatiye derxist holê, di heman demê de karakterê faşîst ê desthilatdariya AKP'ê aşkere kir û polîtîkayên AKP'ê îflas kir."

'Tecrîda li ser Rêberê me ya 17 sal in tê meşandin, polîtîkaya şerê bê exlaqî û gemari ye'

Di daxuyaniyê de hat gotin, "Rêberê me ku destketiyên mezin da Kurdan û gelên Tirkiyeyê, nîşan da ku aştî ji şer bêhtir pêwîstiya xwe bi têkoşîneke mezin heye" û ev xal hat destnîşankirin:

"Di şexsê Rêberê me de ku gav bi gav veguherî însiyatîfa aştiyê û vîna çareseriyê, gelê Kurd dîl hatiye girtin. Bi zexta 'ya komkujî, ya teslîmiyet' re jinayeke bênasname, bêkok, lal, bêdîrok-bêcivak li ser Kurdan hatiye ferzkirin. Dîlgirtin û tecrîda şidandî ya 17 salan a li ser Rêberê me, polîtîkaya şerê herî gemarî û bêexlaq ê li hemberî gelê me tê meşandin e. Ev polîtîka bûye mertalê desthilatdariya AKP'ê. Li pişt vî mertalî, operasyonên şelandin, bi rê û rêbazên kurt dewlemendbûyîn û parastina desthilatdariya gemarî bi xwîn a çend serçeteyan, hatiye meşandin. Bi desthilatdariya AKP'ê re gelên Tirkiyeyê rastî operasyonên herî kujer hatine. Bi şerê taybet û polîtîkayên îzolasyonê yên kûrkirî yên li hemberî Rêberê me re, hem Tirk hem jî gelê Kurd bi gefa şerekî bi xwîn, dîl hatiye girtin. Bi zexta 'Ya dîktatoriya AKP'ê, yan jî şerê navbera gelan ê bi xwîn' re hatiye xwestin, ku gelên me teslîm bên kirin.

'Gelê me azadiya xwe bi azadiya Rêberti re kiriye yek'

Rêberê me ji destpêkê ve ketiye nava hewldanên aştiyê û veguheriye hêviya aştiyê ya gelên me. Rêberê me ji bo gelên me bûye nav û pêşengê jiyana aştî, demokrasî û însanî. Gelên me gihaştine wê radeyê ku jiyana însanî û demokrasiyê, bi parçebûna sîstema Îmraliyê û azadiya Rêberê me re dibîne. Hilmstendin û jiyana demokrasî û aştiyane ya gelê me, bi azadiya Rêberê me re bûye yek. Azadiya Rêberê me wê were wateya; derxistina dîktatoriya AKP'ê ji her qadên Kurdistan û Tirkiyeyê, tê wateya azadiya gelên me."

'Azadiya gelê me şînbûna aştî û demokrasiyê ye'

KJK'ê destnîşan kir ku çareserî û azadî li cîhaneke bê AKP'ê pêkan e û got, "Gelên me ku wê ti carî teslîmî dîktatoriya AKP'ê nebin, wê têkoşîn û yekîtiya xwe ya antî faşîst mezin bikin. Li dijî çeteyên faşîst ên tevgera taybet ên AKP'ê yên DAIŞ'î, parastina aştî û demokrasiyê wê nasnameya têkoşîna paradîgma û jiyana xweser a demokratîk a Rêberê me biafirîne; Rêberê me û gelên me azad bike. Têkoşîn û rûmeta jinê wê ti carî rê nede faşîzma AKP'ê ya ku di destpêkê de jinê û azadiya jinê hedef digire. Ji holê rakirina faşîzm û desthilatdariya AKP'ê ku bi ti awayî êdî ne rewa ne, bilindkirina rûmeta mirovahiyê, wezîfeya exlaqî û wijdanî ya her kesî ye. Em bang li her kesî dikin ku xwedî li wijdan û exlaqê mirovahiyê derkevin û têkoşîna li dijî tecrîda li ser Rêberê me mezin bikin. Azadiya Rêberê me, şînbûna aştî û demokrasiyê ye. Aştî û demokrasî wê bi Rêberê me re şîn bibe. Pêwîste gelên me li dora vê hêviyê bicivin, bi hêz û morala mezin a ji Rêberê me werdigire re, vê têkoşîna wijdanî û bi rûmet mezin bike."

(rc)