JINHA

AMED - Bi pêşengiya jin li Amedê bi sedan jin li hev civiyan û ji bo jinên ku bi destê dewletê ve hatine qetilkirin meşiyan. Jinan destnîşan kir ku jinên berxwedêr tên hedef girtin û wiha gotin: "Li hember tirsa ku dixwazin avabikin, berxwedana jinan bo mirovahiyê dibe hêviyek nû."

Bi pêşengiya Kongreya Jinên Azad (KJA) bi dirûşma "Dewlet qatîlê jina ye" bi sedan jin li ber avahiya DBP'ê civiyan û ji bo jinên ku bi destê dewletê hatine qetilkirin heya Parka Koşuyoluyê meş pêk anîn û daxuyanî dan çapemeniyê. Parlementera HDP'ê ya Amedê Sîbel Yîgîtalp, Hevseroka DBP'ê Hafîze Îpek jî tevlî meşê bûn. Jinan di meşê de wêneyên jinên ku ji 7'ê Hezîranê û vir de bi destê dewletê hatine qetilkirin rakirin û panqarta ku li ser "Dewlet qatîlê jina ye" hatî nivîsandin û dovîzên "Jin jiyan azadî", "Qatîl AKP", "Qatilê jin û zarokan dewlete", "Şîdeta ser jin bîrdoziye" û "Jiyana bê jin em ê li ser serê wede hilweşînin" hatin hildan.

Gelek jin avahiyan bi tilîliyên xwe piştgirî dan çalakiyên jinan. Daxuyanî li Parka Koşuyoluyê ji aliyê endama KJA'ê Derya Ozgul ve hat xwendin. Derya diyar kir ku li ber çavê her kesê komkujî pêk tê û wiha got, "Kolan, tax, bajar, navçe, dibistan û malên me tên bombe kirin. Pêşeroj û jiyana me tê tinekirin. Li kolanên me toma, panzer û wesayîtên zirxî digerin. 'JOH-POH' jin, zarok û hemû sivîlan hedef digirin. Rêxistinên Mafê Mirovan ên Navnetewî, Ewrupa û herî giring jî muxalîf bêdeng dibin. Dema ku mijar dibe kurd êdî Rêveberî-Daraz, Muxalîf û Medya dibin yek. Medya qirkirinan dinexême."

'Qatîl JOH, qatîl POH û qatîl dewlet'

Derya li Cizîr, Silopi, Şirnex Nisêbîn, Sur, Farqîn û Stenbolê qetilkirin û hilewşîna bajaran bibîrxist û wiha domand: "Mirovên ji ber qirkirinê dimînin jî wan bê av û xwarin ji mirinê re dihêlin. Jin ji aliyê sekvanan û tîmên tayîbet ve tên qetilkirin. Li qatîlan negerin, qatîl JOH, POH û dewlete. Dest dane ser jiyana zarokan. Qirkirinên ser jinan sucê mirovahiyê ye. Li hember vê tirsê berxwedana jinê hêviya mirovahiyê ya nû ye."

'Yên li berxwedanê xwedî dernekevin dê bibin hevparê qirkirinê'

Parlementera HDP'ê Sibel Yigitalp jî hemû jinên di nava berxwedanê denin silav kir. Sibel bilêv kir ku 24 roje bi çekên giran êrîşî Surê dikin, mirovan qetildikin, lê li gel hemû êrîşan jî gel li qadane û di nava berxwedanê dene. Sibel da zanîn ku ew di nava êrîşên hovane yên herî giran de li ber xwe didin û wiha berdewam kir: "Gelê kurd ji bo wekheviya gelan tekoşînê didin. Ev tekoşîn pêdiviya hemû gelên Tirkiyê ye. Dema ku em li vê berxwedanê xwedî dernekevin dê hişmendiya yekane û faşîzane bê ser kar. Em gelek kin, weke gel nasnameya me heye. Heya bidestxistina vê nasnamê emê berxwedana xwe berdewam bikin. Dema ku em li vê berxwedanê xwedî dernekevin emê bibin hevkarê qirkirinê." Sibel anî ziman ku sedema hemû qirkirinan hikumeta AKP'ê ye, dê teqez gel hesabê vê bipirsin.

Piştî axaftinan jin bi çepik û tilîliyan belavbûn.

(rc/zt)