Şevîn Şervan/Ruken Dêrik/ JINHA

REMÊLAN - Rêvebera TEV-DEM'ê Henîfe Hûseyîn balkişand ser polîtîkayên ku li hember gelê Kurd tê pêk anîn û bilêvkir ku gelê Kurd ji dîrokê heya roja îro li hember polîtîkayê înkar û îmhayê berxwedide û destnîşan kir ku gelê Kurd êdî ne geleke ku bê xapandine.

Rêvebira TEV-DEM'ê Henîfe Hûseyîn derbarê qedexeyên ku li navçe û bajarên bakûrê Kurdistan, komkujiya Roboskî û jiyana xweseriyê yê li Rojava nirxand. Henîfe komkujiya Roboskî bi bîrxist û wiha got, "Dîroka Tirkiyê bi komkujiyan dagirtiye û dixwaze bi komkujiyan siyasetê pêk bîne. Li kuderê tengavî dijî, li wir darbeyê leşkerî pêk tîne. Darbeyên leşkerî maf û zagonên mirovahiyê binpêdike û komkujiyan rewa dike. Berxwedanên li Kurdistanê her dem bi komkujiyan hatî çewsandin. Armanca dewleta Tirk vîna gelan şikandin û bi tirsê bişavtinê avakirine."

'Kurd ji dîrokê heya roja îro li hember polîtîkayê tinekirinê li berxwedide'

Henîfe da zanîn ku polîtîkayên komkujiyê gelê Kurd bi zorê neçarî koçberiyê dike û wiha domand: "Bi dijminahiya xwe yê li hember gelê Kurd siyasetên qirkirina çandî pêk tînin. Eger em li dîroka Kurdistanê binêrin ji berxwedana Seyît Rizayan heya Bedîrxan Began her dem bi serî hildan û berxwedanan dagirtiye. Lê ew îsyan herdem bi komkujiyan hatî çewsandin. Naxwezin ji peyva kurdbûnê şop bihêlin. Lê li hember polîtîkayên komkujî û tinekirinê gelê Kurd bi berxwedana xwe vala derxistiye. Zîhniyeta ku îro komkujiyan pêk tîne heman zîhniyete. Kurd ji dîrokê heya roja îro li hember polîtîkayê tinekirinê li berxwedide."

'Kurd ne bê alternatîfin'

Henîfe destnîşan kir ku li pişt êrîşê çeteyên DAIŞ'ê ên li ser Rojava Tirkiyê hebû û wiha pêde çû: "Dewleta Tirk bi piştgirî û hêza ku dayîne çeteyên DAIŞ'ê mûhra xwe li siyasetê da. Tirkiyê ji bo ku vîna gelê Kurd bişkîne komkujî pêk tîne. Tirkiyê li hember alîgirên guhertin û veguhertinê ye. Komkujiya Enqere, Pîrsûs û Amedê bingeha xwe ji vê digre. Ciwanên kurd pêşengiya şoreşê dikin û li berxwedidin. Bêguman dewleta Tirk vê rastiyê napejrîne. Eger polîtîkayên tinekirinê bidomîne gelê kurd jî ne bê alternatîfe. Alternatîfên me ên di warê siyasî, leşkerî, aborî û erdnîgarî de heye. Mafê me yê îlankirina xweserî û dewlet xwastinê jî heye. Armanca gelê Kurd tenê avakirina pergala demokrasiyê ye û avakirina jiyanek azade. Divê dewleta Tirk vê yekê zanibe, gelê Kurd ne gelek bê xapandine êdî. Divê vê rastiyê bixe serê xwe."

'Hesabê Roboskî divê were pirsîn'

Henîfe diyar kir ku divê hesabê komkujiya Roboskî bi aweyek hêz bê pirsîn û wiha berdewam kir, "Li Kurdistanê bi sedan cînayetên faîlê wan nediyar hene. Faîlê van cînayetan yek jî nehatî dîtin û hinek ji wan hestiyê wan jî nîne. Cînayetên ku pêk aniye bêguman ew ê nexwaze derkeve holê, ji ber di çerçoveyek demokratîk de naxwaze bi gelê Kurd re bijî. Gelê Kurd di azadiyê xwede bi îsrarin û divê sînorê wan ên li herêmên xwerêveberin hatî îlankirin bên rakirin. Divê bajarên din piştgirî bidin wan. Eger Nisêbîn li berxwedide, divê tevahî bajar piştgirî bide. Parlementerên ku gel wan hilbijartiye divê li gel berxwedana gel bin. Hêzên tevahî cîhanê ji komkujiyê re çavên xwe girtiye. Banga me jî ew e ku her kes çavê xwe li hember berxwedana gel veke û piştgirî bide."

(rc)