ژنها

ئامەد- هاوڵاتیانی ناوچەی سوری شاری ئامەد لەبەرامبەر بڕیاری رووخاندنی خانوەکانی ئەو ناوچەیە لەلایەن ئەردۆغانەوە ناڕەزاییان دەربڕی و رایانگەیاند کە ئەگەر خانوەکانیشیان بەسەردا بڕوخێنن، ئەوان چۆڵی ناکەن.

هێزەکانی دەوڵەتی تورکیا لە هەموو ڕووێکەوە ناوچەی سوری شاری ئامەدی خستۆتە ژێر گەمارۆیەکی سەختی سەربازی و وەک ناوچەیەکی سەربازیان ڕاگەیاندوە، هەرچی ماڵ، سامان، میرات و شوێنەواری مێژووی هەیە دەیڕوخێنن و تاڵانی دەکەن. هاوڵاتیانی ناوچەکە بە زۆر لە ماڵەکانیان دەردەکرێنە دەرەوە و ماڵەکانیان بە شۆفل دەڕوخێنن، هاوڵاتیان سورن لەسەر بەرخۆدانی و وتیان: "ئەگەر پێویست بێت لەژێر خانوەکانمان دەمرین، بەڵام ئەم وڵاتەمان بۆ دوژمنان جێ ناهێڵین، کەسمان ئامادەنین ژیانمان بە پارە بفرۆشین."

"تا دوا هەناسەم بەرخۆدانیم هەڵبژاردوە"

خەتیجە کارادەنیز، کە ماوەی ٢٠ ساڵە لە گەڕەکی ئەسکەندەرپاشای ناوچەی سور دەژیت، بەمشێوەیە بۆمان ئاخاوت: "سور وارگەی بەرخۆدانیە چەندە خۆشمان دەویست، ئێستا زیاتر خۆشمان دەوێت، ماڵ و دوکان و گەڕەکەکان بۆ دەوڵەت جێناهێڵین، بەهیچ شێوەیەک بڕیاری ئەردۆغان قبوڵ ناکەین، ئەگەر بەسەر تەرمەکانمان تێپەڕن ئینجا دەتوانن ماڵەکانما بڕوخێنن."

"٩٠ ساڵە لە سورم هەر لە سوریش دەمرم"

عەلی ئاڵتون ٩٠ ساڵ تەمەنیە و ڕیگەیاند کە بەرخۆدانی گەلی سور شکستی بە دوژمنان هێناوە و وتی: "هەرگیز ناتوانن بیروباوڕی کورد لاواز بکەن، ئێمە کوردین هێشتا نازانن کە ئێمە ڕۆڵەی کێین و چین؟ هەتا ئامادەم شەڕ بکەم لە بەرامبەر سوپای فاشیست و چەک هەڵگرم، بەڵام ئامادە نیم دوای ٩٠ ساڵ ئەم ژیانە جێبێڵم."

"لەگەڵ دایکم دەمرم و ناچمە شارەکانی تورکیا"

منداڵانی سور سوریان بەجێنەهێشتوە و دەڵێن نامانەوێت لە سور دوورکەوینەوە، منداڵێکی ١١ساڵان بەناوی(ئا،گ)وتی: "نامەوێت لە سور دەرکەوم، ئێمە لێرە لەگەڵ هاورێکانمان یار دەکەین و دەگەڕێین، بۆچی ماڵەکانمان دەڕوخێنن، بۆچی گەڕەکانمان داگیردەکەن؟ زۆر غەریبی ئەو هاوڕێیانەی خۆم دەکەم کە لەلایەن دەوڵەت بەچەک کوژران، دایکم هەمیشە دەڵێت؛ مەگەر بەمردن لە سور دوورم خەنەوە، منیش لەگەڵ دایکم بابمرم و نەچم بۆ شارەکانی تورکیا."

"ژیان و یادگاری بەپارە نافرۆشرێن"

سەڤجان ئەرزەن ژنێکیتری ناوچەی سورەو ئاماژەی بەوە کرد کە دەیانەوێت ژیانیان بەپارە بکڕن و وتی: "تا کۆتایی بەرخۆدانی دەکەین و کەس ناتوانێت لە ماڵ بەدەرمان بکات، مەگەر خانومان بەسەر هەڵوەشێننەوە کەزۆر ماڵیان هەڵوەشاندەوە بەسەر ماڵ و منداڵان، ئامادەین بمرین بەس سور چۆڵ ناکەین، دەیانەوێت بەپارە قەناعەتمان پێبێنن تا واز لەماڵ و حاڵی خۆمان بێنین،بەڵام هەرگیز ماڵ، ژیان و یادگاریەکان بە پارە نافرۆشرێن و ناکڕدرێن."

(ش ب)