ژنها

ناوەندی هەواڵ – بۆ یەکەم جار لە مێژووی خۆیاندا ژنێک وەک سەرکردەی پارتی دیموکراتی ژاپۆن، کە گرنگترین پارتی ئۆپۆزسیۆنە دەستنیشان دەکرێت.

رێنهۆ موراتا، سیاسەتمەداری (تەمەن ٤٨) ، توانی ببێتە سەرۆکی پارتی دیموکراتی ئۆپۆزسیۆنی ژاپۆن.

رێنهۆ پێشتر مۆدێلی جلوبەرگی مەلەکردن و دواتریش پێشکەشکاری تەلەڤزیۆنی بووە. ئەو ئێستا بووەتە سەرۆکی گەورەترین پارتی ئۆپۆزیسیۆنی ژاپۆن و رایگەیاندووە، پارتی دیموکراتی ژاپۆن دەکاتە پارتێکی شۆڕشگێڕ کە بتوانێت گۆڕانکاریی گەورە بێنێتە ئاراوە و گرفتە گەورەکان چارەسەر بکات. ئەمە لەکاتێکدایە ژمارەی لایەنگرانی ئەم پارتە رووی لە کەمی کردووە.

رێنهۆ بەشێک لە بەرنامەکانی خۆی خستووەتەڕوو کە سەرەڕای رەخنەگرتن لە سیاسەتەکانی دەوڵەت، سیاسەتی جێگرەوە دەخاتەڕوو و پارتەکەش دەکاتە پارتێکی جەماوەری.

رێنهۆ موراتا سێیەمین ژنە لەم چەند مانگەی دوواییدا لە ژاپۆن پۆستی گەورەی وەرگرتبێت. پێشتریش پۆستی هەر یەکە لە سەرۆکی شارەوانی تۆکیۆی پایتەخت و وەزیری بەرگریی ئەو وڵاتە لەلایەن ژنانەوە پڕ کرانەتەوە.

(ش ب)